最新文章

2015年6月28日 星期日

手提風扇 2015 全攻略! 夏日出街前必讀!






夏日炎炎,最舒服就梗係留係屋企涼冷氣煲劇! 不過總無可能成個夏天都宅在家, 要出街又唔想身水身汗,最近大熱的流動風扇(俗稱芭蕉扇)就最適合隨身帶,隨時隨地為大家送上清涼感覺。但究竟點樣可以安全玩盡芭蕉扇?就等 Edward 同大家分享一下啦!

有咩款好揀?

芭蕉扇,當然唔係講緊《西遊記》入面鐵扇公主拿住撥孫悟空個把啦!不過流動風扇要可以稱得上「芭蕉扇」之名,自然要夠大風先得啦!Edward 就行咗轉鴨記,為大家品評咗幾款芭蕉扇,而家先同大家評一評。
IMAG0189

兩草嘢有交易- Mini Fan

呢款 Mini Fan 芭蕉扇,兩草嘢有交易!但咁平當然無好嘢,無得較風速之餘,仲要勁細風,拿出街就好似拿住支勁雞嘅 USB 風扇仔咁,完全伏!
售價:$20
可較風速?:不可
特異功能:無
風力強度:*
發出噪音:*(其實係因為無乜風都唔會有咩噪音……)
IMAG0187

似足普通風扇 – LiLeng

呢款 LILENG 風扇,單睇外表真係同普通屋企用嘅風扇有八成相似!佢唔止風力幾夠之餘,仲可以有三段速調較,加上有幾種顏色揀。
售價:$40 左右
可較風速?:可以,三段速
特異功能:無
風力強度:****
發出噪音:****
P1050750

風力最強 – F95B

呢款 F95B 芭蕉扇,係而家最多人揀的款式。點解?無他,最大風係佢!就算係夏日炎炎、烈日當空嘅室外,有佢就好似帶住部迷你冷氣出街咁涼,你話爽唔爽?而且佢唔止都有三段風速,仲有電筒模式,行夜山時當埋電筒照都得(不過就唔可以同時做電筒同埋風扇 sosad)。
售價:$42 左右
可較風速?:可以,三段速
特異功能:電筒
風力強度:*****
發出噪音:****
P1050753
▲除咗風力最強,F95B 仲可以當埋電筒用添!不過遺憾係電筒風扇唔可以同時使用。
IMAG0185

好似大風啲(其實唔係)

呢款不知名得個樣的芭蕉扇,睇落比之前介紹的 F95B 體積較大,而且下面的按鍵好似有唔同場景模式禁,感覺好似 grand 啲又大風啲咁!但實情試過之後,比 LILENG 或者 F95B 都要細風,而且個三個場景模式(睡眠、自然風、大風)其實咪又係三段速風,仲要貴啲又無特異功能,真係哂氣!
售價:$68(送較剪
奪命個隻
可較風速?:可以,三段速
特異功能:無
風力強度:***
發出噪音:***
P1050740

「變型金剛」版芭蕉扇!

講到玩到最盡,Edward 行勻成條鴨寮街,呢款堪稱「變型金剛」級數的「四合一」多功能便攜式迷你 USB 風扇最吸引到我。佢設有手柄,單係拿已經比一般芭蕉扇方便,而且風力都唔比 F95B 差好多。風速除了三段速外,仲有自然風模式,風力一大一細咁,比直吹大風舒服得多。另外,佢唔止可以用來當「尿袋」(但得 1A 電壓輸出),行山時又可以邊吹風扇邊用電筒,番到屋企仲可以做埋座檯風扇!不過售價就比 F95B 貴一倍,一分錢一分貨。
售價:$88
可較風速?:可以,四段速(細、中、大、自然風)(注意:座檯模式不能轉速)
特異功能:電筒、外置充電器、座檯風扇
風力強度:****
發出噪音:****
P1050743
▲加個配件可以當電筒,而重點係風扇可以同時使用,勁過 F95B!
P1050745
▲拆咗個風扇頭,插上去個座檯架,仲可以當埋座檯風扇。

鴨記買到的電都有幾種?

除咗為大家嚴選咗邊款芭蕉扇最正之外,既然叫得做「流動」風扇,入面當然係入住粒「充電池」啦!但唔知大家知唔知,芭蕉扇的充電池都幾有款?而家就同大家介紹一下,同埋評一評邊款電池好啲。
P1050738

雜嘜電

在鴨寮街,最容易搵到就係呢種無名無廠商無標名製造地的雜嘜電池,只寫住係用 18650 鋰電池。呢種電池感覺最唔安全,不過就好平,兩草幾嘢就買到,如果大家唔驚爆炸,可以考慮。
廠商:不知名
售價:$25
值買指數(售價 / 安全):***** / *
P1050737

共田電

呢款叫做共田風扇專用電池,同樣是 18650 鋰電池,根據網上資料,它標明是 ICR 18650,應是採用 Samsung 電池,感覺較為安全。不過相比上面雜嘜電的 4.2V 4,800mAh(講就咁講,信不信由你……反正 Edward 就唔係太信),佢就得 3.7V 2,200mAh 容量,電量較少,輸出電壓都較低。一般購買 4 草嘢或以上的風扇,都會採用呢款電池。
廠商:共田(Samsung 電池)
售價:不詳(好似無散賣)
值買指數(售價 / 安全):N/A / ***
P1050736

三洋電

相信大家都聽過 Sanyo 三洋電池的鼎鼎大名,雖然三洋已經將電池業務賣盤俾 Panasonic,但後者似乎仍然有用三洋大名推出電池。雖然未知是否在日本製造,但感覺已好似安全一點。不過售價較貴,成 $40 一粒 3.7V 2,500mAh 電池,呢個價位已經幾乎可以買多部芭蕉扇,係咪值得睇各位了。
廠商:三洋 Sanyo
售價:$40
值買指數(售價 / 安全):*** / ****
P1050733

Panasonic 松下電

最後一款,亦係最貴的一款充電池,就係呢款由 Panasonic 松下推出的最新款 NCR18650B 鋰電池。據網上資料表示,呢款電池同之前 Sanyo 推出的同款電池包裝係一樣的,估計應採用相同生產線。而且係電池上面標明係 Made in Japan,安全性能上點都有信心保證掛!唔止容量有 2,900mAh,電壓都可以高到去 4.2V,講質量應該係咁多款之中最好的一款。不過售價就成 $50 / 粒,值唔值自己考慮了。
廠商:Panasonic 松下(日本製造)
售價:$50
值買指數(售價 / 安全):** / *****

更多選擇?淘寶尋!

其實係鴨記,有賣電池的店舖雖然都唔少,但始終選擇唔夠多。其實大家大可去位於鴨記,專賣電子配件的華輝望望。如果想更多選擇,其實可以去淘寶網搵 搵,不過提提大家:係淘寶買真係要好小心,唔好一味貪平!例如:幾蚊人仔一粒 Panasonic 電,信唔信得過?大家心知肚明啦。
taobao

小結:松下電安心啲(不過貴過把風扇 sosad)

總結來講,如果講到性價比,共田採用 Samsung 電池,加上隨 F95B 芭蕉扇附送,點睇性價比都高一截,其實大家係淘寶搵,都係 13 元人仔一粒(未計運費),性價比都幾高,不過 Edward 知道 unwire 讀者對中國貨信心一般,為求安心我都係強烈建議大家換電池 ! 而選擇方面,Edward 覺得揀 Panasonic 電會比較穩陣,始終日本製造,雖然係貴一截,但點計都安心好多。

小貼士:充電池勿充過夜!

睇新聞,近排都會見到有啲人為芭蕉扇充電,最後導致爆炸或者著火意外!事實上,無論係上面提及的邊一款充電池,都係用最普及的 18650 系列電池,是當年 SONY 為了節省成本而研發出來的標準鋰離子充電池,優點是容量較大(以單枚電池計算),而且內阻較細,更可充 500 次以上,壽命相比一般充電池長。此外,它亦沒有記憶效應,不用在充電池將電池電量耗盡,使用更方便,所以當年唔少手提電腦、玩具、相機等,都有用呢款電 池,甚至組合幾枚電池組成電池組,加大電池容量。
fan
不過缺點是相比現時較穩定的聚合物鋰電池,18650 鋰電池較易發生短路、甚至爆炸!有些較昂貴的款式,會加入保護線路,以防電池過充,而且生產要求較高,因而增加生產成本。而芭蕉扇所採用的 18650 電池,無論是何處製造也好,數十元一枚電池,相信大家都唔期望廠商會加入保護線路。
所以 Edward 建議大家為這些電池充電時,不要充過夜,當顯示為充電完成時,就應該拔除充電器,以免因過充導致意外!

6 招玩盡芭蕉扇!

好了,芭蕉扇選購同大家講了,電池都為大家介紹了。普通人會覺得芭蕉扇就係芭蕉扇,除了拿來當風扇用,仲可以做乜?其實機仔細細,芭蕉扇可以玩的玩點可多著呢!以下 Edward 就為大家介紹 5 招,等大家可以玩盡芭蕉扇啦!

1) 加防滑貼唔洗「郁郁共」

有些風力較大又無座的芭蕉扇,都有同一個問題:當放在檯面當一般風扇用個時,因為摩打高速轉動,導致風扇機身震動,變成唔識「企定定」係度,會周圍 郁,如果檯面較滑,情況就更明顯!要芭蕉扇乖乖地「企定定」,其實大家可以係 12 蚊店買啲防滑膠番來,貼係風扇底部,再放係檯面,就唔會郁來郁去啦。
P1050762P1050750

2) 加魔術貼打孖上

就算夏日炎炎,但有啲人體質上其實未必受得住整夜開冷氣。但如果單吹風扇,又好似唔係好夠涼。其實大家可以將兩把芭蕉線並排放在一起,中間用魔術貼將兩把芭蕉線的底部連在一起,咁樣打孖上,隨時仲涼好多(最緊要可以慳唔少電費呀!!!)
P1050772

3) 兩扇合體玩透爐

夏日炎炎,相信都唔會有人選擇係呢個季節出去燒烤。但係遲啲秋涼,又係咪代表芭蕉扇可以「收皮」?咁又唔係!用上面的技巧將兩把芭蕉線的底部貼在一起,當要透爐的時候,用雙芭蕉有效加大送空氣的輸送,好快將爐透著,完全無難度!
P1050773

4) 痴係唔同地方都得!

仲有種玩法,如果大家想邊打機邊吹風扇,又唔想個角度剩係吹住隻手或者心口,可以係電視或者 LCD 芒邊同埋芭蕉扇底各黏一張魔術貼,咁樣就算再刁鑽嘅角度,芭蕉扇都可以穩穩陣陣放係個度啦。
P1050765

5) 勾係 BB 車唔驚焗親

唔少父母帶 BB 出街,都會將佢放係 BB 車上面,尤其是 BB 要訓晏覺個時,但父母又想行街,更加會咁樣做。當然,如果太曬的話,父母會選擇打開 BB 車面蓋,費事 BB 曬傷;但咁樣就會搞到 BB 車內籠好焗熱,BB 都唔會覺得舒服。其實可以係市面買番個幾十蚊的萬用勾,一邊勾住 BB 車的推車柄,另一面就夾住把芭蕉扇,再將角度對準 BB 車頂蓋吹向車內,咁樣 BB 就既唔怕曬親,又唔驚焗親熱親啦。
P1050778

6) 買埋叉機一連叉

如果想一次過叉幾粒電,可以買番部一次過可以差幾粒 18650 電池的叉機,無論行山定係去露營,帶多幾粒真係吹成晚都 no problem 啦!
T1ldrfFoVdXXXXXXXX_!!0-item_pic

疑問:加冰袋會唔會更凍?

有讀者表示,如果加個冰袋係芭蕉扇背面,係咪可以再凍啲呢?Edward 就買咗隻傳統用來退熱嘅冰袋,雪凍後放係風扇後面之後開,證實係唔 work 的。其實要用冰製冷,要找一個保溫的容器(例如:發泡膠盒),然後倒冰進去,再鑽個窿並將芭蕉扇固定,再開風扇,咁就可以係容器入面的冷空器吹出來,咁樣 先得。要就咁加個冰袋就可以進一步製冷,大家唔好發夢了。
P1050780
reference: unwire.hk
SimplyTaste Web Developer

亞洲全新網上服務買賣平台。每種服務6美元/50港元。

最新文章

熱門文章